<< Previous    |     Next >> 

​

16. HOE KAN ONS AS KATOLIEKE GLO DAT MARIA VANAF HAAR ONTVANGENIS VAN SONDE GEVRYWAAR WAS AANGESIEN DIE BYBEL ONS LEER DAT 'ALMAL GESONDIG HET' (ROM. 3:23)?

 

Wanneer ’n mens die Heilige Skrif lees moet ’n mens versigtig kan onderskei hoe woorde gebruik word- somtyds word woorde met hul letterlike betekenis gebruik terwyl dieselfde woorde dalk op ’n ander plek met ’n meer figuurlike betekenis gebruik word. In die Griekse taal word daar verskillende betekenisse onderskei in die gebruik van die woord ‘almal’ (in Grieks ‘pas’). ‘Almal’ beteken nie altyd letterlik ‘elkeen sonder uitsondering’ nie. In sy brief aan die Romeine skryf St. Paulus byvoorbeeld ‘en so sal die hele Israel[almal in Israel] gered word’ (Rom. 11:26).

 

Tog weet ons dat nie almal gered sal word nie. Op dieselfde wyse verwys St. Paulus na die lidmate van die Romeinse Kerk as mense wat ‘in alle opsigte in Hom ryk gemaak is, in elke woord en alle kennis’ (vgl. 1 Kor. 1:5) - weereens kan hierdie teks nie letterlik opgeneem word nie omdat dit tog duidelik was dat die Romeine nie oor alle kennis oor Christus beskik het nie. Hier het ’n mens dus ook te make met die manier hoe mense, en veral die Jode, hulself destyds uitgedruk het. St. Paulus haal in sy brief aan die Romeine vir Psalm 14:2-3 aan wat die volgende te sê het: ‘Daar is niemand wat verstandig is nie, daar is niemand wat God soek nie’ (vgl. Ook Ps. 53:1-3). Tog praat Dawid in die volgende psalm van die mens ‘wat onkreukbaar optree en reg doen’ (Ps. 15:2). Dit is dus duidelik dat die jammerklaag in Ps. 14:2-3 van oordrewe taal gebruik maak om ’n punt te beklemtoon – dit is nie veronderstel om letterlik opgeneem te word nie. St. Paulus se woorde in Romeine 3:23: ‘want almal het gesondig en dit ontbreek hulle aan die heerlikheid van God’ moet dus in hierdie konteks gelees en geïnterpreteer word.

 

As Katolieke glo ons dat Maria sondeloos was en ons baseer ons geloof op Lukas 1:28 waar sy as ‘begenadigde’ oftewel ‘vol van genade’ beskryf word. Die Griekse woord wat hier gebruik word is kecharitomene en word afgelei van die wortel charis wat regdeur die Nuwe Testament met die woord genade vertaal word. Dit is dieselfde woord wat in die Ou Testament gebruik word om na die Verbondsark te verwys. Die vroeë Christene het dan ook hierdie beeldspraak op Maria oorgedra – sy is die Ark van die Nuwe Verbond (sy het Christus in haar gedra en so die wêreld ingebring) net soos die Verbondsark God se aanwesigheid onder die Volk van die Ou Verbond gedra het. Om met genade gevul te wees (letterlik tot oorlopens toe vol) laat geen plek oor vir die sonde nie. Hierdie geloof dat Maria onbevlek ontvang is in haar moeder se skoot, m.a.w. sondeloos gebore is staan bekend as die Onbevlekte Ontvangenis van Maria en is nog altyd deur Christene geglo.

 

Lees gerus: Gen. 3:15; Jeremia 1:5; Lukas 1:15; Lukas 1:35 (vgl. Matteus 17:5; Exodus 24:15-16; 40:34-35; 1 Konings 8:10); Lukas 1:39-45, 56 (vgl. 2 Samuel 6:10-12); Lukas 1:42 (vgl. 2 Samuel 6:15); Lukas 1:43 (vgl. 2 Samuel 6:9); Lukas 1:44 (vgl. 6:14-16; 1 Kronieke 15:29).

​

​

  << Previous    |     Next >> 

 

Back to KATOLIEKE ANTWOORDE

​