<< Previous    |     Next >> 

​

7. WAT GLO ONS KATOLIEKE OMTRENT ’N PERSOONLIKE INTERPRETASIE VAN DIE BYBEL?

 

Dit is belangrik om te verstaan dat ons as Katolieke die Bybel, die Kerk en die gewyde Tradisie as een geheel sien – m.a.w. ’n mens kan dié dele nie van mekaar skei nie. Die Kerk se rol kan nie apart van die Bybel en die Tradisie begryp word nie – net so min kan ’n mens nie die Bybel op sy eie probeer verstaan sonder om die rol van die Kerk en Tradisie te erken nie. As Katolieke glo ons dat die Heilige Skrif God se geïnspireerde, onfeilbare, betroubare geskrewe woord en openbaring bevat. Die Bybel staan sentraal in ons geloof, maar die Bybel dra op sy eie geen gesag nie – die Bybel word deur die leergesag (die magisterium) van die Kerk geïnterpreteer. Hierdie is nie iets wat die Kerk op ’n latere stadium uitgedink het nie – vanaf die apostels is hierdie waarheid van een generasie na die volgende oorgelewer. Die Bybel self maak dit duidelik dat die Tradisie en die Kerk gesag dra – nêrens leer die Bybel ons dat die Bybel alleen gesag dra nie. Die Bybel het interpretasie nodig: Anders eindig ’n mens in die jammerlike situasie van die moderne Protestantisme – duisende verskillende kerkies en sektes wat onderling van mekaar verskil en argumenteer en elkeen glo dat hy alleen oor die korrekte interpretasie van die Bybel beskik. Ons eie geskiedenis hier in Suid-Afrika is ’n voorbeeld van hoe gevaarlik ’n willekeurige persoonlike interpretasie van sekere Bybeltekste kan wees (dink maar aan al die pogings destyds om apartheid teologies te probeer regverdig deur Bybeltekste as bewyse daarvoor te gebruik). Die eerste Christene het beslis nie geglo dat elkeen die Bybel op sy eie manier kan interpreteer nie – hulle het ook nie eers oor die volledige Bybel beskik nie (onthou hulle het vir ’n lang tyd slegs die Ou Testament gehad) en tog was hulle volwaardige Christene, want hulle het die Kerk gehad. Hou in gedagte dat waar die Nuwe Testament na die Heilige Skrif verwys die Ou Testament bedoel word aangesien die Nuwe Testament op daardie stadium nog nie geskryf of saamgestel was nie. Deur die eeue heen het miljoene mense goeie Christelike lewens gelei sonder dat hulle ooit eers die Bybel gelees het. Tot redelik onlangs toe was die meeste mense ongeletterd, maar hulle het die Kerk en die Tradisie gehad wat aan hulle die lewenswaarhede wat in die Bybel geleer word, oorgedra het. Dit is verwaand en onchristelik om te dink dat elkeen van ons die Bybel kan interpreteer soos dit ons pas. Die Bybel is in die eerste plek God se Kerk se boek. As Katolieke glo ons dat dit baie belangrik is om die Bybel te lees en onsself met die Heilige Skrif vertroud te maak. Van die vroegste tye af het die Katolieke Kerk gewone mense aangemoedig om die Bybel te lees en lank voor die sestiende eeu (toe die drukkuns uitgevind was en Bybels op grootskaal versprei kon word) het die Kerk alreeds die Bybel in verskillende tale laat vertaal. Dit is egter die Kerk se taak om te waak teen ’n verkeerde interpretasie (en vertaling) van die Heilige Skrif. Die Bybel is die Kerk se kosbaarste besitting en dit is die Kerk wat moet toesien dat die Bybel nie vir eie gewin of verkeerd gebruik word nie. Daarom was die Kerk nog altyd gekant teen ’n individuele interpretasie van die Heilige Skrif wat nie die rol van die Kerk en Tradisie in ag neem nie – so ’n interpretasie is onbybels en kan net tot dwaalleer lei (soos die geskiedenis dan ook duidelik al bewys het). St. Augustinus (354-450) het die standpunt van die vroeë Christene rondom die Bybel goed opgesom: Hierdie standpunt is nog altyd getrou deur die Katolieke Kerk gehandhaaf.

 

Ons weet dat al daardie gebruike...wat in die eerste plek nie in die Heilige Skrif voorkom nie, maar deel vorm van ons Tradisie, aan ons oorgelewer is deur die apostels en vergaderings van die eerste Christene, en oor ’n gesag beskik wat lewensnoodsaaklik is vir die Kerk.

 

Lees gerus: Matteus 15:3,6; Markus 7:8-9,13; Romeine 6:17; 1 Korintiërs 11:2,23; 1 Korintiërs15:1-3; Galasiërs 1:9,12; Efesiërs 4:14; Kolossense 2:8; 1 Tessalonisense 2:13; 2 Tessalonisense 2:15; 2 Tessalonisense 3:6; 1 Timoteus 4:1; 2 Timoteus 1:13-14; 2 Timoteus 2:2; 2 Timoteus 4:3-4; 2 Petrus 1:20; 2 Petrus 2:21.

​

​

  << Previous    |     Next >> 

 

Back to KATOLIEKE ANTWOORDE

​